jo’au la gadganzu joi la sotyge’a joi la ajbo
.i pu ze’a mi pensi tu’a lo te pilno be zo kau .i mi jinvi lodu’u mi jdice lo plixau versiio be lo smuni .e mi pacna lonu loi jbopre poi nelci leka logji je le vrici klesi ka saske cu nelci la’e dei
zo kau sinxa lo fancu si’au jecu panra zo ce’u leka makau to va’oda’i lonu do na jimpe lo te pilno be zo kau bei mi kei ko ca’o tcidu toi gerna fi ce’u .u zo kau na za’a se pilno fi lo fadni fancu to ku’i zo ce’u ja’a co’e toi .ipe’i lo krinu cu du’u lo se sinxa be zo kau cu na se sabji lo terbri lo te cusku .i mi stidi la’e di’e
.i bi’unai lu ko’a ko’e me’au loka ce’u ce’u broda li’u smudu’i lu ko’a ko’e broda li’u .eje ca’e lu ko’a ko’e me’au loka ce’u makau broda li’u smudu’i lu ko’a ka ko’e ce’u broda li’u .eje ca’e lu ko’a me’au lodu’u makau broda li’u cu smudu’i lu ko’a ka ce’u broda li’u
.i lo drata te pilno be zo kau zo’u ai ba ciksi .u ko denpa
za’o lonu pu’o zanru tu’a dei kei lo smuni be mu’a lo cimoi be lo terbri be zo zmadu be’o je roda poi panra cu cizra jecu na te djuno de .i so’i jbocre cu kakne co pilno fi lo plixau .e lo te cusku cu jimpe .u lo se satci be fi leka jimpe ce’u cu cmalu .i mi smuciksi lo smuni be zo zmadu mu’i lodu’u mupli
.i ca’e lo smuni be zo zmadu cu ka me’au la’e di’e .i lo ckaji be lo me’au bo’i be bo’a cu nu’a za’u lo ckaji be lo me’au bo’i be bo’e
.i mu’a lo mlatu lo gerku cu zmadu leka mi nelci ce’u fi’o gradu makau
.i bu’u lo fanmo be dei mi ciksi za’uxo’e smuni be lo panra
bi’unai zo ma cu pasi’e loi reivla .u ca’e ro te pilno be zo kau cu ka’e banro lo te pilno be lu makau li’u .i ciksi
.i pamai zo xu zo’u lu du’u xukau broda li’u noi smudu’i lu jei broda li’u to ko catlu ti toi cu banro lu du’u makau jezyje’u lodu’u broda li’u
.i remai zo mo zo’u lu du’u mokau li’u banro lu du’u me’au makau li’u
.i cimai zo xo zo’u lu du’u xokau broda cu brode li’u banro lu du’u ni’e makau broda cu brode li’u
.i vomai zo ji zo’u lu du’u broda jikau brode li’u banro lu du’u broda ji’oi me’au makau te’u brode li’u
.i mumai zo pei zo’u lu du’u peikau broda li’u banro lu du’u makau se cinmo do do’e lodu’u broda li’u
.i xamai zo cu’e zo’u lu du’u cu’ekau ko’a broda li’u banro lu du’u fi’o me’au makau ko’a broda li’u
.i zemai zo se’u’o zo’u lu du’u se’u’okau broda li’u banro lu du’u se xi xokau broda li’u to li’a nitcu co rere’u banrygau toi
.i va’oda’i lonu nitcu co pilno da poi simsa lu setese li’u kei lo namcu poi se nitcu cu me li re ce’o ci ce’o re vau mu’a
.i bijeromai zo pau’i zo’u pluja .e clani ciksi fo la’e di’e .i va’o lonu da’i djica co spuda lo preti poi se pagbu zo pau’i kei do kakne co bacru lo va’o lo drata ku tolgendra .iseni’ibo lo spuda be le’e preti cu li’a te pilno zo lo’u ce’o zo le’u .i ro te pilno cu banro lo panra be lu makau basti tezu’e lonu jetnu kei lo spisa be lo preti be’o poi se tcita zo pau’i li’u
zo ni va’o lonu da’i pilno no zo ce’u cu panra zo du’u loka xukau tu’a pa lu mokau li’u cu sarcu lonu smudra .izu’unai va’o lonu da’i pilno zo ce’u cu panra zo ka ku’i
.i mu’a lo mi zdani lo mi karce cu jibni loni ce’u litce li xokau to se zanru mi fa lonu basni fa lu makau li’u lu li xokau li’u toi
.i sei smuvelcki zo zmadu fi’o te krefu li re se’u ko’a goi lo ckaji be lo me’au bo’i be bo’a ko’e goi lo ckaji be lo me’au bo’i be bo’e cu nu’a za’u .ije bo’o selsumji ko’a ko’e
.i sei smuvelcki zo zenba se’u bo’a lo purci versiio be bo’a cu zmadu bo’e bo’i
.i sei smuvelcki zo frica se’u lo ckaji be lo me’au bo’i be bo’a lo ckaji be lo me’au bo’i be bo’e cu na du
.i sei smuvelcki zo panra se’u bo’a bo’e frica bo’i po’o
.i sei smuvelcki zo traji se’u roda poi me lu’a bo’o ku’o ko’a goi lo me’au bo’i be bo’a bei da zo’u bo’e me’au ko’a
.i sei smuvelcki zo djuno se’u ge bo’a sanji lodu’u bo’e noi srana bo’i cu jetnu bo’o gi gonai bo’e cu du’umdu gi da zo’u bo’a sanji lodu’u da ckaji lo me’au bo’e
.i sei smuvelcki zo dukse se’u fanta bo’i fa lodu’u bo’a ckaji lome’au bo’e be zo’ei lo tcini be bo’a
.i sei smuvelcki zo banzu se’u cumki fa bo’i ri’a lodu’u bo’a ckaji lome’au bo’e be zo’ei lo tcini be bo’a